Fakulteti i Gjuhëve të Huaja

Universiteti “Dardania” në strukturën organizative të fakulteteve e ka të sistemuar edhe Fakultetin e Gjuhëve të Huaja, i cili tash për tash ofron studime në programin e Gjuhës dhe Letërsisë Angleze.

Njëri nga prioritetet e Fakultetit të Gjuhëve të Huaja është përfshirja e tyre në ato nivele zhvillimore në drejtim të realizimit të programeve sa më atraktive dhe sa më të mira, të cilat gjeneratave të reja do t’u ofrojnë një arsimim bashkëkohor dhe një shkallë më të afërt dyerve të botës së shkencës.

Sot të gjitha vendet anë e mbanë rruzullit tokësor janë përfshirë në rrjedha të fuqishme të proceseve gjithëintegruese të globalizimit. Ekonomitë e vendeve me teknologji më të zhvilluar janë vende më me ndikim në ekonominë dhe politikën botërore. Në mënyrë që të rinjtë të jenë në hap me këto ndryshime, Universiteti “Dardania” me planin e saj zhvillimor synon të ofrojë studime cilësore të gjuhëve të vendeve më me ndikim në botë, siç janë studimet e anglistikës, të gjermanistikës, e të romanistikës.

Synimi primar i këtij fakulteti, sidomos pas mëvetësimit të vendit, është që përmes këtyre programeve t’u mundësojë studentëve një formim profesional dhe bashkëkohor në këto fusha studimesh.  Funksionimi efikas i këtij fakulteti do të mbështetet parësisht në studimin e gjuhëve dhe shkathtësive gjuhësore dhe njohurive për gjuhët, ndërkaq studimi i letërsisë kulturës dhe civilizimit anglo amerikan do të kontribuojë në thellimin e njohurive për gjuhët. Ky synim i këtij fakulteti do të ishte i një rëndësie të vecantë për Kosovën si një shtet i cili synim parësor ka anëtarësimin në institucione dhe organizata ndërkombëtare.

            Të studiuarit e gjuhëve të huaja paraqet një sfidë, por edhe kënaqësi të lartë për gjeneratat e reja në Kosovë, pasi që vetëm në këtë formë do të jemi në rrjedhën e integrimeve euroatlantike. Të studiuarit e gjuhëve të huaja nga studentët kosovarë paraqet rrugën më të sigurt drejt plotësimit të kritereve në rrugëtimin tonë drejtë Evropës së bashkuar. Së këndejmi, Fakulteti i Gjuhëve të Huaja i ka qëllimet vijuese:

• të përgatitë kuadro profesionale për tregun e punës, të cilët, të pajisur me njohuri dhe shkathtësi të nivelit të lartë, do të jenë të aftë të përballen dhe t’i tejkalojnë sfidat e komunikimit bashkëkohor;
•  të përgatitë kuadro profesionale të pajisur me njohuri të nivelit të lartë për vlerat kulturore dhe civilizimin e popujve përkatës që do të japin kontributin e tyre në komunikimin ndërkulturor;
• të përgatitë kuadro me potencial për ngritje të mëtejme profesionale, të krahasueshëm me nivelin e kolegëve të tyre në hapësirën evropiane, në SHBA e gjetiu.

Drejtimi Gjuhë dhe Letërsi Angleze

Studimet universitare në përgjithësi kanë për qëllim aftësimin e studentëve për ushtrimin e profesionit të ardhshëm. Me realitetin e ri të krijuar në Kosovë, gjuha angleze është bërë gjuhë e parë komunikimi; rrjedhimisht njohja e kësaj gjuhe dhe kulture krijon mundësi më të mëdha për integrim në tregun e punës.

Studimet në Drejtimin Gjuhë dhe Letërsi Angleze në nivelin Bachelor zgjasin gjashtë semestra dhe brenda tij janë harmonizuar tri fusha kyçe studimesh: Gjuha dhe komunikimi, letërsia, dhe kultura e qytetërimi angloamerikan. Këto fusha pastaj zbërthehen në lëndët e veçanta që zhvillojnë dhe thellojnë shkathtësitë gjuhësore të studentëve, që i aftësojnë për komunikim të rrjedhshëm.

Përveç aspektit pragmatik, studentët e këtij programi do të pajisen edhe me njohuri të thelluara për nivele të ndryshme të sistemit gjuhësor të gjuhës angleze përmes lëndëve: gramatikë e gjuhës angleze, fonetikë, morfologji, sintaksë, leksikologji. Tërësia e studimeve të letërsisë ofrohet përmes lëndëve që paraqesin periudhat më të rëndësishme letrare, duke i shtuar edhe komponentin e qytetërimit angloamerikan, që shtjellohet si lëndë e veçantë.   

Lëndët zgjedhore në kuadër të programit Gjuhë dhe Letërsi Angleze synojnë të ofrojnë njohuri dhe shkathtësi shtesë dhe të zgjerojnë spektrin e dijes së studentëve. Përmes tyre studentët do të pajisen me njohuri dhe shkathtësi në fusha më të ngushta profesionale sipas nevojave dhe afiniteteve të tyre, siç janë: përkthimi (teori dhe praktikë e përkthimit, përkthim joletrar, përkthimi simultan dhe konsekutiv), përdorimi i gjuhës për komunikim për qëllime specifike ( anglishtja për biznes, ekonomi, jurispodencë, etj).

            Për të qenë më të përgatitur për ta mbajtur hapin me nevojat e kohës, ky program u ofron studentëve edhe modulet e gjuhës shqipe,  të gjuhës gjermane e gjuhës frënge me qëllim të rrumbullakimit të njohurive gjuhësore dhe të aftësimit të tyre për të qenë konkurrent dhe adaptabil në tregun e punës.

Pas përfundimit të suksesshëm të këtij programi studentët do të jenë në gjendje:

• të komunikojnë rrjedhshëm dhe me përpikëri në nivel të avancuar si me shkrim ashtu edhe me gojë me folësit burimorë dhe joburimorë të gjuhës angleze;
• të dëshmojnë njohuri të nivelit të lartë të sistemit gjuhësor dhe aftësi për aplikim të njohurive të tyre në praktikë në forma dhe nivele të ndryshme komunikimit publik;
• të përkthejnë tekste tipash të ndryshëm, si të shkruara ashtu edhe të folura, si dhe të ndërmjetësojnë për ta lehtësuar komunikimin mes palëve anglishtfolëse dhe joanglishtfolëse;
• të dëshmojnë nivel të lartë të njohurive për ngjashmëritë dhe dallimet kulturore dhe të ndërmjetësojnë për lehtësimin e komunikimit ndërkulturor.

Qëllimi përfundimtar i studimeve universitare në Drejtimin Gjuhë dhe Letërsi Angleze është përgatitja e kuadrove për të marrë titullin Bachelor i Gjuhës Angleze. Për të fituar titullin Bachelor i Gjuhës Angleze, studenti duhet të akumulojë 180 pikë kredite, dhe të përfundojë provimet e parapara me planin dhe programin studimor. Studimet përfundojnë me mbrojtjen publike të punimit të diplomës para komisionit. 

Pas përfundimit të studimeve në këtë drejtim, të diplomuarit  do të mund të punësohen në organizata të ndryshme qeveritare dhe joqeveritare, administratë publike, kompani të ndryshme publike e private që ushtrojnë veprimtari ekonomike, ndërmarrje tregtare e shërbyese, që kanë raporte ose klientë ndërkombëtarë, ku kërkohet qoftë komunikimi në gjuhë angleze, qoftë ndërmjetësimi me qëllim lehtësimi të komunikimit mes palëve anglishtfolëse dhe joanglishtfolëse.

            Diploma Bachelor i Gjuhës Angleze u mundëson studentëve të diplomuar në këtë drejtim vazhdimin e ngritjes akademike dhe profesionale dhe të drejtën e regjistrimit në studimet e nivelit Master.